اسلام آباد / سانگهڙ: (خاص رپورٽ) سرڪاري تيل ۽ گئس ڪمپني آئل اينڊ گيس ڊولپمينٽ ڪمپني لميٽيڊ (OGDCL) اعلان ڪيو آهي ته سنڌ جي ضلعي سانگهڙ ۾ واقع بوبي ڊيپ-1 (Bobi Deep-1) کوهه مان تجارتي بنيادن تي خام تيل جي پيداوار باقاعده طور شروع ڪئي وئي آهي.
ڪمپني موجب، هن کوهه مان شروعاتي مرحلي ۾ روزانو لڳ ڀڳ 2 هزار بيرل خام تيل حاصل ڪيو پيو وڃي، جيڪو ملڪ جي توانائي جي ضرورتن کي پورو ڪرڻ ۽ درآمدي تيل تي انحصار گهٽائڻ ۾ مددگار ثابت ٿيندو.
ماهرن جو چوڻ آهي ته ملڪي سطح تي نون تيل جي ذخيرن مان پيداوار شروع ٿيڻ سان پاڪستان جي توانائي واري شعبي کي هٿي ملندي. مقامي سطح تي خام تيل جي پيداوار وڌڻ سان پرڏيهي ناڻي سان تيل درآمد ڪرڻ جي ضرورت ۾ ڪجهه گهٽتائي اچي سگهي ٿي، جنهن سان زرمبادلي جي بچت پڻ ممڪن ٿيندي.
سانگهڙ ضلعو اڳ ئي تيل ۽ گئس جي ذخيرن سبب اهم حيثيت رکي ٿو. بوبي ڊيپ-1 مان پيداوار شروع ٿيڻ سان نه رڳو سنڌ جي توانائي واري شعبي ۾ واڌارو ٿيندو، پر علائقي ۾ معاشي سرگرمين ۽ روزگار جا موقعا به وڌڻ جا امڪان آهن.
او جي ڊي سي ايل جو چوڻ آهي ته جيڪڏهن پيداوار موجوده سطح تي برقرار رهي يا وڌيڪ وڌي، ته هي دريافت ملڪ جي تيل جي پيداوار ۾ اهم ڪردار ادا ڪري سگهي ٿي. ڪمپني مستقبل ۾ پڻ نون ذخيرن جي ڳولا ۽ توانائي جي مقامي وسيلن کي استعمال ۾ آڻڻ لاءِ پنهنجون ڪوششون جاري رکندي.
توانائي ماهرن موجب، پاڪستان جي وڌندڙ توانائي ضرورتن کي نظر ۾ رکندي مقامي تيل ۽ گئس جي ڳولا ۽ پيداوار ۾ اضافو قومي معيشت لاءِ انتهائي اهم آهي، ڇاڪاڻتہ ان سان درآمدي خرچ گهٽجندا ۽ توانائي جي فراهمي وڌيڪ مستحڪم بڻجي سگهندي.
