واشنگٽن:(انٽرنيشنل ڊيسڪ) آمريڪي صدر ڊونلڊ ٽرمپ کي هڪ اهم قانوني ڌڪ لڳو آهي، جتي آمريڪي سپريم ڪورٽ جنسي زيادتي ۽ بدنامي سان لاڳاپيل ڪيس ۾ سندس اپيل ٻڌڻي لاءِ قبول ڪرڻ کان انڪار ڪري ڇڏيو. ان فيصلي کان پوءِ هيٺين عدالتن جو اڳوڻو حڪم برقرار رهندو ۽ ٽرمپ کي ليکڪا اي. جين ڪيرول کي 50 لک آمريڪي ڊالر ادا ڪرڻا پوندا.
آمريڪي سپريم ڪورٽ سومر ڏينهن ٽرمپ جي اپيل ٻڌڻ کان انڪار ڪيو. ان جو مطلب اهو آهي ته اپيلي عدالت جو اڳوڻو فيصلو برقرار رهندو ۽ ٽرمپ کي ڏنڊ جي رقم ادا ڪرڻي پوندي.
هي ڪيس آمريڪي ليکڪا اي. جين ڪيرول طرفان داخل ڪيو ويو هو، جنهن الزام هنيو هو ته ڊونلڊ ٽرمپ 1990ع واري ڏهاڪي ۾ نيويارڪ جي هڪ ڊپارٽمينٽل اسٽور ۾ ساڻس جنسي زيادتي ڪئي ۽ بعد ۾ جڏهن هن عوام آڏو اهو الزام لڳايو ته ٽرمپ سندس ساک کي به نقصان پهچايو.
2023ع ۾ نيويارڪ جي هڪ وفاقي جوري ٽرمپ کي جنسي زيادتي ۽ بدنامي جي دعويٰ ۾ ذميوار قرار ڏيندي اي. جين ڪيرول جي حق ۾ فيصلو ڏنو هو. جوري ٽرمپ کي 50 لک ڊالر معاوضي طور ادا ڪرڻ جو حڪم ڏنو هو.
واضح رهي ته هي ڪيس ديواني (Civil) نوعيت جو هو، نه ڪي فوجداري (Criminal)، تنهن ڪري عدالت ٽرمپ کي ڏوهاري قرار ڏيڻ بدران نقصان جي ذميواري بابت فيصلو ڏنو.
ڊونلڊ ٽرمپ شروع کان ئي اي. جين ڪيرول جي الزامن کي رد ڪندا رهيا آهن. سندن چوڻ آهي ته هنن ڪڏهن به ڪيرول سان اهڙو واقعو پيش نه آيو ۽ عدالتن جا فيصلا سياسي محرڪن تي ٻڌل آهن.
قانوني ماهرن موجب سپريم ڪورٽ طرفان اپيل رد ٿيڻ سان هي ڪيس عملي طور پنهنجي انجام تي پهچي ويو آهي. هاڻي ٽرمپ لاءِ هيٺين عدالتن جي فيصلي کي چئلينج ڪرڻ جا امڪان تمام محدود رهجي ويا آهن.
هي فيصلو آمريڪي سياست ۽ عدالتي نظام ۾ اهم حيثيت رکي ٿو، ڇاڪاڻتہ اهو هڪ موجوده آمريڪي صدر سان لاڳاپيل انتهائي حساس قانوني معاملي بابت سپريم ڪورٽ جو واضح موقف ظاهر ڪري ٿو.
