اسلام آباد: آءِ ايم ايف وفد پاران ايندڙ مهيني پاڪستان اچڻ جو امڪان آهي، جتي هو نئين مالي سال جي بجيٽ تياري ۽ ملڪ جي اهم معاشي هدفن تي تفصيلي ڳالهيون ڪندو۔
ذريعن موجب، آءِ ايم ايف لاءِ سڀ کان وڏو چئلينج ايف بي آر جي ڪمزور ڪارڪردگي هوندي، ڇاڪاڻتہ ٽيڪس هدف بار بار پورا نہ ٿيڻ سبب اداري بابت ڳڻتي برقرار آهي۔
آءِ ايم ايف جو وفد ٽيڪس ڄار وڌائڻ ۽ آمدني ۾ اضافي لاءِ دٻاءُ برقرار رکندو، ان سلسلي ۾ ڊجيٽل ٽيڪس نظام لاڳو ڪرڻ تي پڻ زور ڏنو ويندو تہ جيئن ٽيڪس اوڳاڙي ۾ بهتري اچي۔
ان کانسواءِ توانائي شعبي ۾ سڌارا، گردشي قرض گهٽائڻ جي حڪمت عملي ۽ بجلي ۽ گيس جي اگهن ۾ ترتيب بابت پڻ مشاورت جو امڪان آهي۔
آءِ ايم ايف وفد سان گڏ نجڪاري پروگرام ۽ سرڪاري ادارن جي سڌارن بابت معاملا بہ غور هيٺ ايندا، ان سان گڊ گورننس، شفافيت ۽ ڪرپشن خلاف قدمن تي بہ ڌيان ڏنو ويندو۔
ذريعن موجب ايندڙ جائزي ۾ ڪارڪردگي جي بنياد تي آءِ ايم ايف طرفان نئين قسط جاري ڪرڻ جو فيصلو ڪيو ويندو، جڏڏھن تہ هدف پورا نہ ٿيڻ جي صورت ۾ وڌيڪ شرطون لاڳو ٿيڻ جو امڪان پڻ موجود آهي۔……
