ڪراچي (مانيٽرنگ ڊيسڪ): پاڪستاني شوبز انڊسٽري ۾ ڊرامن جي معيار ۽ عالمي پليٽ فارمن سان ڀيٽ بابت بحث دوران اداڪارا عروه حسين پنهنجي راءِ جو اظهار ڪندي چيو آهي ته معياري پاڪستاني ڊرامن کي نيٽ فلڪس جي معيار سان ڀيٽڻ مناسب ناهي. سندس چوڻ آهي ته پاڪستاني فنڪار ۽ تخليقڪار ان کان به بهتر ڪم ڪري رهيا آهن.
هڪ انٽرويو دوران عروه حسين اهڙي سوچ تي تنقيد ڪئي، جنهن ۾ ڪنهن پاڪستاني ڊرامي جي تعريف ڪندي ان کي نيٽ فلڪس جي معيار جو قرار ڏنو ويندو آهي. اداڪارا موجب، اهڙي ڀيٽ سان مقامي تخليقن جي پنهنجي سڃاڻپ ۽ صلاحيت کي نظرانداز ڪيو وڃي ٿو.
عروه حسين چيو ته رڳو ڪنهن ڊرامي يا منصوبي جو ڪنهن ايپ يا آن لائن پليٽ فارم تي نشر ٿيڻ ان جي معيار جي ضمانت نٿو بڻجي. سندس خيال ۾، پاڪستاني ڊرامن ۽ فنڪارن جي ڪم کي ٻين پليٽ فارمن سان ڀيٽڻ بدران ان جي پنهنجي معيار ۽ فني صلاحيتن جي بنياد تي پرکڻ گهرجي.
اداڪارا وڌيڪ چيو ته پاڪستاني ڊرامن جي اصل طاقت انهن جون ڪهاڻيون، ڪم ڪرڻ جو انداز ۽ ڪردارن ۾ موجود حقيقي جذبات آهن. سندس نظر ۾ تخليقن ۾ جذبن جي سچائي بنيادي اهميت رکي ٿي، جيڪا مقامي ڊرامن کي پنهنجي الڳ سڃاڻپ ڏئي ٿي.
