اسلام آباد (مانيٽرنگ ڊيسڪ): پاڪستان ۽ آمريڪا وچ ۾ واپار ۽ اقتصادي سهڪار وڌائڻ لاءِ جاري ڳالهين ۾ اهم اڳڀرائي ٿي آهي، جڏهن ته آمريڪا پاڪستان جي زرعي شين، معدنيات، جديد ٽيڪنالاجي ۽ صنعتي شعبن ۾ سيڙپڪاريءَ ۾ دلچسپي ظاهر ڪئي آهي.

اسلام آباد ۾ وفاقي وزير واپار ڄام ڪمال خان سان آمريڪي ناظم الامور نٽالي اي بئڪر ملاقات ڪئي، جنهن دوران ٻنهي ملڪن وچ ۾ ٻطرفي واپار، سيڙپڪاري ۽ اقتصادي سهڪار کي هٿي ڏيڻ بابت تفصيلي ڳالهه ٻولهه ڪئي وئي. ملاقات ۾ وزيراعظم جي واپار ۽ صنعت بابت ڪوآرڊينيٽر رانا احسان افضل خان ۽ واپار واري سيڪريٽري جواد پال پڻ شرڪت ڪئي.

واپار واري سيڪريٽري جواد پال ٻڌايو ته پاڪستان ۽ آمريڪا وچ ۾ تجويز ڪيل واپاري معاهدي بابت ڳالهين ۾ اهم اڳڀرائي ٿي آهي، پر معاهدي جي ڪجهه فني شقن تي آمريڪي واپاري نمائندي جي آفيس سان وڌيڪ ڳالهه ٻولهه گهربل آهي.

ملاقات ۾ پاڪستاني انبن ۽ کجين کي آمريڪي مارڪيٽ تائين رسائي ڏيڻ تي به غور ڪيو ويو. پاڪستاني انبن جي برآمد لاءِ آمريڪي معائني واري ٽيمن جا دورا تيز ڪرڻ ۽ بلوچستان جي کجين کي آمريڪي منڊيءَ تائين رسائي ڏيارڻ جي ضرورت تي زور ڏنو ويو. آمريڪي وفد ان سلسلي ۾ لاڳاپيل اختيارين سان رابطو ڪرڻ جي خاطري ڪرائي.

ان کان علاوه، آمريڪا مان ڪپهه ۽ سويابين جي درآمد وڌائڻ، زرعي شعبي ۾ جديد ٽيڪنالاجي، فوڊ پروسيسنگ ۽ ڪولڊ چين جي ترقيءَ سميت مختلف شعبن ۾ سهڪار تي پڻ خيالن جي ڏي وٺ ڪئي وئي.

وفاقي وزير واپار ڄام ڪمال خان آمريڪي ڪمپنين کي پاڪستان جي زرعي ۽ صنعتي شعبن ۾ سيڙپڪاري جي دعوت ڏيندي کين 23 کان 26 نومبر تائين ڪراچيءَ ۾ ٿيندڙ فوڊ ايگ 2026 نمائش ۾ شرڪت جي دعوت پڻ ڏني. هن بلوچستان ۾ کجين، زيتون جي تيل ۽ ٻين زرعي شين جي قدر وڌائڻ لاءِ موجود موقعن کي به اجاگر ڪيو.

ملاقات دوران معدنيات، کاڻين جي کوٽائي، فني سهڪار ۽ هنرمند افرادي قوت جي تربيت بابت پڻ ڳالهه ٻولهه ٿي، جنهن تي آمريڪي وفد پاڪستان جي معدنياتي شعبي ۾ سيڙپڪاري ۽ ٽيڪنيڪي سهڪار وڌائڻ ۾ دلچسپي ظاهر ڪئي.

ڄام ڪمال خان حب، بلوچستان کي صنعتي سيڙپڪاري، پيداواري سرگرمين ۽ خصوصي اقتصادي زونن لاءِ اهم هنڌ قرار ڏنو. ملاقات ۾ افغانستان ۽ وچ ايشيا جي مارڪيٽن تائين زميني واپاري رستن کي پيش ايندڙ مسئلن ۽ برآمدات وڌائڻ لاءِ بهتر لاجسٽڪس جي ضرورت تي پڻ غور ڪيو ويو.

ملاقات جي پڄاڻيءَ تي ٻنهي ملڪن واپاري ڳالهين کي اڳتي وڌائڻ، مارڪيٽن تائين رسائيءَ جا مسئلا حل ڪرڻ ۽ ادارن وچ ۾ رابطا مضبوط ڪرڻ تي اتفاق ڪيو.

اسلام آباد (مانيٽرنگ ڊيسڪ) وفاقي حڪومت ۽ پاڪستان تحريڪ انصاف وچ ۾ سياسي ڇڪتاڻ وڌيڪ وڌي وئي آهي، گهرو معاملن واري مملڪتي وزير طلال چوڌري پي ٽي آءِ تي پابندي لڳائڻ لاءِ آئين ۾ گنجائشون موجود هجڻ جي دعويٰ ڪئي آهي، جڏهن ته قومي اسيمبلي ۾ مخالف ڌر جي اڳواڻ محمود خان اچڪزئي 8 ايم اين ايز جي گمشدگي ۽ خيبرپختونخوا جي وڏي وزير بابت سوال اٿاريندي ملڪ ۾ آزاد ۽ شفاف چونڊون ڪرائڻ جو مطالبو ڪيو آهي.

هڪ بيان ۾ طلال چوڌري چيو ته آئين ۾ پي ٽي آءِ تي پابندي لڳائڻ لاءِ ڪيتريون ئي گنجائشون موجود آهن، پر سياسي حڪومت هجڻ باوجود حڪومت اهڙو قدم کڻڻ نٿي چاهي. هن چيو ته حڪومت گورنر راڄ لاڳو ڪرڻ به نه پئي چاهيو، جڏهن ته سندس دعويٰ هئي ته گذريل 14 سالن دوران پي ٽي آءِ دهشتگردي کي سنجيده مسئلو نه سمجهيو.

طلال چوڌري وڌيڪ چيو ته جيڪڏهن حڪومت جا سمورا اختيار اڊيالا جيل، بني گالا يا مراد سعيد جي هٿن ۾ ڏنا ويندا ته پوءِ اهڙا ئي نتيجا سامهون ايندا.

ٻئي پاسي، قومي اسيمبلي ۾ خيالن جو اظهار ڪندي مخالف ڌر جي اڳواڻ محمود خان اچڪزئي چيو ته اٺ ايم اين ايز گم آهن، ٻڌايو وڃي ته خيبرپختونخوا جو وڏو وزير ڪٿي آهي؟ هن شڪايت ڪئي ته کين ايوان ۾ ڳالهائڻ جو موقعو به نٿو ڏنو وڃي ۽ حڪومت کان سندن مطالبو رڳو آزاد ۽ شفاف چونڊون ڪرائڻ آهي.

هوڏانهن وفاقي وزير طارق فضل چوڌري چيو ته وزيراعظم ۽ مخالف ڌر جي اڳواڻ وچ ۾ ملاقات ذريعي آئيني ذميواريون مڪمل ٿيڻيون آهن. هن واضح ڪيو ته وزيراعظم هائوس شهباز شريف جو ذاتي گهر نه، پر رياستي گهر آهي، جڏهن ته محمود خان اچڪزئي سان ملاقات سندس ذاتي حيثيت ۾ نه، پر مخالف ڌر جي اڳواڻ جي آئيني عهدي جي حوالي سان ٿيڻ گهرجي.

اهڙي ريت، پي ٽي آءِ تي پابندي بابت حڪومتي بيانن، ايم اين ايز جي گمشدگي بابت سوالن ۽ آزاد چونڊن جي مطالبي سبب ملڪ جي سياسي صورتحال ۾ ڇڪتاڻ برقرار آهي.

اسلام آباد (مانيٽرنگ ڊيسڪ) خيبرپختونخوا ۾ ايمرجنسي لاڳو ٿيڻ ۽ گورنر راڄ کانپوءِ پاڪستان تحريڪ انصاف پنهنجي جيل ۾ قيد باني عمران خان ۽ سندس خاندان لاءِ رليف حاصل ڪرڻ جون ڪوششون ٻيهر تيز ڪري ڇڏيون آهن، جڏهن ته پارٽي ذريعن اهم موقعو وڃائڻ جو اعتراف پڻ ڪيو آهي.

رپورٽ موجب، باخبر ذريعن جو چوڻ آهي ته پي ٽي آءِ چيئرمين بيرسٽر گوهر خان حڪومتي اختيارين سان رابطو ڪري عمران خان جي ٽن ڀينرن جي آزادي جي درخواست ڪئي آهي، جن جي 30 ڏينهن واري نظربندي جو مدو پورو ٿي چڪو آهي.

ذريعن موجب، بيرسٽر گوهر خان عمران خان جي گهرواري بشريٰ بي بي سان خاندان جي ملاقاتن جي بحالي جي درخواست پڻ ڪئي آهي، جنهن ۾ اڱاري ڏينهن ٿيندڙ ملاقات به شامل آهي.

ٻئي طرف، پي ٽي آءِ جي ڪجهه ذريعن تسليم ڪيو آهي ته خيبرپختونخوا جي قيادت جي سخت ۽ ٽڪراءَ واري حڪمت عملي سبب عمران خان ۽ سندس خاندان لاءِ پابندين ۾ نرمي حاصل ڪرڻ جو هڪ اهم موقعو هٿان نڪري ويو.

رپورٽ موجب، پارٽي جي خيبرپختونخوا قيادت ان اميد ۾ هئي ته وفاقي حڪومت صوبي ۾ ايمرجنسي لاڳو نه ڪندي ۽ نه ئي گورنر راڄ ذريعي انتظام سنڀاليندي. پارٽي جي ڪجهه اڳواڻن جو خيال هو ته وفاقي مداخلت خلاف عوامي ردعمل حڪومت کي فيصلو واپس وٺڻ تي مجبور ڪري سگهي ٿو.

ذريعن جو چوڻ آهي ته حڪومت سان رابطي ۾ رهندڙ ڪجهه ماڻهن اڳواٽ خبردار ڪيو هو ته ايمرجنسي لاڳو ڪرڻ جو فيصلو حتمي آهي ۽ احتجاجي مارچ توڙي امن امان بابت خدشا ختم ٿيڻ تائين حڪومت ڪنهن ٺاهه لاءِ تيار نه ٿيندي.

رپورٽ ۾ ڄاڻايو ويو آهي ته 11 آڪٽوبر تي ايمرجنسي ۽ گورنر راڄ کانپوءِ صوبي ۾ احتجاجن جو ردعمل توقع کان محدود رهيو. دي نيوز ۾ شايع ٿيل هڪ انٽيليجنس رپورٽ موجب، صوبي ۾ احتجاج جا 16 واقعا رڪارڊ ٿيا، جن ۾ شرڪت ڪندڙن جو سراسري انگ 100 کان گهٽ هو. جڏهن ته باڙا ۾ 13 آڪٽوبر تي ٿيل هڪ احتجاج ۾ شرڪت ڪندڙن جو انگ 500 کان وڌيڪ هو، پر پوليس ڪارروائي کانپوءِ اهو اجتماع ختم ٿي ويو.

هوڏانهن، پي ٽي آءِ وفاقي حڪومت جي مداخلت ۽ ان جي جواز کي رد ڪندي موقف اختيار ڪيو آهي ته اهو قدم سياسي مقصدن تحت کنيو ويو.

رپورٽ موجب، اڳوڻي ڇڪتاڻ باوجود عمران خان ۽ سندس خاندان لاءِ رليف حاصل ڪرڻ جون ڪوششون جاري ٿي سگهن ٿيون، پر اهي ڪوششون ڪامياب ٿينديون يا نه، ان بابت اڃا صورتحال واضح ناهي.