ايراني حڪومت اڳوڻي سپريم ليڊر آيت الله علي خامنه اي جي آخري رسمن جي موقعي تي 6 جولاءِ تي سڄي ايران ۾ عام موڪل جو اعلان ڪري ڇڏيو آهي۔
ايراني حڪومت جي ترجمان موجب 8 جولاءِ تي سڄي ملڪ ۾ يومِ سوڳ پڻ ملهايو ويندو۔
ياد رهي ته ايران جو شهيد اڳواڻ سپريم ليڊر علي خامنه اي 28 فيبروري تي ايران تي ٿيل ابتدائي آمريڪي حملي ۾ شهيد ٿيو هو۔
ايراني حڪومت جي ترجمان جو چوڻ آهي ته تهران ۾ موڪل جو مقصد سوڳوارن جي تهران مان واپسي کي آسان بڻائڻ آهي۔
گذريل ڏينهن ڪميٽي جي سيڪريٽري علي اڪبر پور جمشيديان الوداعي تقريبن جي پروگرام جو اعلان ڪيو هو۔
علي اڪبر پور جمشيديان جو چوڻ هو ته 3 جولاءِ تي دنيا جي مختلف ملڪن جا سربراهه، عهديدار ۽ دانشور شهيد رهبر جي جسدِ پاڪ کي خراجِ عقيدت ۽ احترام پيش ڪندا، جڏهن ته 4 جولاءِ (ڇنڇر) کان عوامي رسمن جي شروعات ٿيندي۔
شهيد رهبر جي آخري ديدار لاءِ امام خميني مصليٰ جا دروازا عوام لاءِ کوليا ويندا۔ 5 جولاءِ تي تهران ۾ امام خميني مصليٰ ۾ شهيد رهبر ۽ ساڻس گڏ شهيد ٿيل گهرڀاتين جي جنازي نماز ادا ڪئي ويندي۔
علي اڪبر پور جمشيديان موجب طئي ٿيل پروگرام تحت شهيد رهبر جو جسدِ پاڪ 8 جولاءِ تي عراق منتقل ڪيو ويندو، جتي نجف اشرف ۽ ڪربلاءِ معليٰ ۾ جنازي جون تقريبون منعقد ڪيون وينديون۔
شهيد ايراني سپريم ليڊر علي خامنه اي ۽ ساڻس گڏ شهيد ٿيل گهرڀاتين جي تدفين 9 جولاءِ تي مشهد ۾ ڪئي ويندي۔
واضح رهي ته شهباز شريف جولاءِ جي پهرين هفتي دوران ايران جو دورو ڪندا۔
ذريعن موجب وزيراعظم شهباز شريف آيت الله خامنه اي جي جنازي نماز ۾ شرڪت ڪندا۔
ايران جو دورو مڪمل ڪرڻ کان پوءِ وزيراعظم ترڪيه جو به دورو ڪندا۔
