اسلام آباد ۾ جاري امڪاني ايران-آمريڪا سفارتي ڳالهين جي حوالي سان ايران جي اعليٰ قيادت هڪ اهم موقف اختيار ڪيو آهي. ايران جي اول نائب صدر محمد رضا عارف چيو آهي ته جيڪڏهن اسلام آباد ۾ آمريڪا سان سڌيون يا اڻ سڌيون ڳالهيون ڪاميابي سان ٿين ٿيون ته اهڙو معاهدو طئي ٿي سگهي ٿو جيڪو نه رڳو ٻنهي ملڪن پر عالمي امن لاءِ به فائديمند هوندو.
هن پنهنجي بيان ۾ واضح ڪيو ته ايران آمريڪا سان ڳالهين جي نتيجي ۾ هڪ اهڙي سفارتي حل ڏانهن وڃڻ لاءِ تيار ٿي سگهي ٿو، جيڪو خطي ۾ ڇڪتاڻ گهٽائڻ ۽ سياسي استحڪام لاءِ مددگار ثابت ٿئي.
پر ساڳئي وقت هن سخت لهجي ۾ خبردار ڪيو ته جيڪڏهن ڳالهين جي ڪنهن به مرحلي ۾ اسرائيل جا نمائندا شامل ڪيا ويا يا اسرائيل سان لاڳاپيل ڪو به فريم ورڪ آندو ويو ته پوءِ ڪنهن به معاهدي جو امڪان ختم ٿي ويندو.
محمد رضا عارف وڌيڪ چيو ته اهڙي صورتحال ۾ ايران پنهنجي دفاعي حڪمت عملي جاري رکندو، ۽ جيڪڏهن دٻاءُ يا عسڪري صورتحال وڌي ته جواب به وڌيڪ سخت ٿي سگهي ٿو، جنهن جا نتيجا عالمي سطح تي سنگين اثر وجهي سگهن ٿا.
سفارتي ذريعن موجب، اسلام آباد هن وقت ايران ۽ آمريڪا وچ ۾ امڪاني ڳالهين جو اهم مرڪز بڻيل آهي، جتي ٻنهي ڌرين جا موقف انتهائي حساس مرحلي ۾ داخل ٿي چڪا آهن ۽ ايندڙ ڪلاڪ اهم اڳڀرائي ظاهر ڪري سگهن ٿا۔…
