جماعت اسلامي مهانگائي ۽ پيٽروليم شين تي لاڳو ٽيڪسن خلاف ملڪ گير احتجاجي تحريڪ هلائڻ جو اعلان ڪري ڇڏيو آهي.
لاهور ۾ پريس ڪانفرنس ڪندي جماعت اسلامي جي امير حافظ نعيم الرحمان چيو ته 7 آگسٽ تي سڄي ملڪ جون اهم شاهراهون بند ڪري احتجاج ڪيو ويندو ۽ عوام کي ٻڌايو ويندو ته حڪمران طبقو ڪيئن عوام جي پئسن تي ڌاڙو هڻي رهيو آهي.
هن چيو ته جماعت اسلامي پرامن سياسي مزاحمت تي يقين رکي ٿي ۽ ان حوالي سان سڀني سياسي ۽ سماجي ڌرين سان رابطا ڪري کين هڪ پيج تي آڻڻ جي ڪوشش ڪئي ويندي.
حافظ نعيم الرحمان سوال اٿاريندي چيو ته پيٽروليم ليوي جو اوگرا سان ڪهڙو تعلق آهي؟ سندس چوڻ هو ته شاگردن جي آمدني تي ٽيڪس لاڳو نٿو ٿئي، پر هو به پيٽروليم ليوي ادا ڪرڻ تي مجبور آهن.
هن حڪومت تي تنقيد ڪندي چيو ته “حڪومت ڀتو جي نالي تي ليوي وصول ڪري رهي آهي، هي جڳا ٽيڪس آهي، جنهن کي ڪنهن به صورت ۾ قبول نٿو ڪري سگهجي.”
جماعت اسلامي جي امير دعويٰ ڪئي ته جيڪڏهن پيٽروليم ليوي ۽ ٻين ناجائز ٽيڪسن کي ختم ڪيو وڃي ته پيٽرول جي قيمت لڳ ڀڳ 200 رپيا گهٽجي سگهي ٿي.
هن وڌيڪ مطالبو ڪيو ته حڪومت عوام کي ٻڌائي ته آءِ پي پيز (IPPs) سان معاهدن بابت ڪهڙي اڳڀرائي ٿي آهي، جڏهن ته حڪمران پنهنجي مراعتن ۾ اضافو ڪري عوام جي حقن تي ڌاڙو هڻي رهيا آهن.
