لاهور: پاڪستان سميت سڄي دنيا ۾ رهندڙ ڪشميري اڄ يومِ شهداءِ ڪشمير ملهائي رهيا آهن.
13 جولاءِ 1931ع تي ڊوگرا فوجن 22 ڪشميرين کي شهيد ڪيو هو. مظلوم ڪشميري اڄ به ڀارت جي قبضي خلاف جدوجهد جاري رکيو اچن ٿا، جڏهن ته ڀارت اڄ به والاريل ڄمون ۽ ڪشمير کي ظلم ۽ جبر جي مرڪز بڻائي ڇڏيو آهي.
گذريل ٽن ڏهاڪن دوران 96 هزار کان وڌيڪ ڪشميري شهيد ٿي چڪا آهن، جڏهن ته ٻه لک کان وڌيڪ ٻار يتيم ٿي ويا آهن ۽ هزارين ڪشميري ڀارت جي بدنام جيلن ۾ قيد آهن.
جولاءِ 1931ع ڪشمير جي آزادي واري تحريڪ جو اهو تاريخي موڙ هو، جڏهن عبدالقدير نالي هڪ ڪشميري جي ڪيس جي ٻڌڻي جيل ۾ جاري هئي. جيل ٻاهران هزارين ڪشميري گڏ هئا. ظهر جو وقت ٿيو ته هڪ نوجوان اذان شروع ڪئي، جنهن تي ڊوگرا فوج گولي هلائي ۽ کيس شهيد ڪري ڇڏيو. ان کان پوءِ ٻئي، ٽئين ۽ چوٿين نوجوان اذان مڪمل ڪرڻ جي ڪوشش ڪئي، پر هڪ هڪ ڪري 22 نوجوان شهيد ڪيا ويا. تنهن هوندي به اذان مڪمل ٿي ۽ تاريخ شاهد بڻجي وئي ته اها قرباني ڪشمير جي آزادي واري جدوجهد جو بنياد آهي.
حريت ڪانفرنس جي ڪنوينر غلام محمد صفي چيو ته ڪشميري عوام هر سال هن ڏينهن کي يومِ شهداءِ ڪشمير طور ملهائين ٿا. هن چيو ته ڪشميري ستن ڏهاڪن کان وڌيڪ عرصي کان ڀارت جي قبضي خلاف جدوجهد ڪري رهيا آهن ۽ قربانين جي لازوال تاريخ رقم ڪري رهيا آهن.
حريت ڪانفرنس جي اڳواڻ منظور احمد شاهه چيو ته ڀارت اڄ به والاريل ڄمون ۽ ڪشمير کي ظلم ۽ جبر جي آماجگاهه بڻائي ڇڏيو آهي. هن چيو ته گذريل ٽن ڏهاڪن دوران 96 هزار کان وڌيڪ ڪشميري شهيد ٿي چڪا آهن، ٻه لک کان وڌيڪ ٻار يتيم ٿي ويا آهن ۽ هزارين ڪشميري ڀارت جي بدنام جيلن ۾ قيد آهن.
پاڪستان ڪشميري عوام جي حقِ خوداراديت جي حمايت جاري رکندو: صدر ۽ وزيراعظم
صدر ۽ وزيراعظم پاڪستان يومِ شهداءِ ڪشمير جي موقعي تي 1931ع جي 22 شهيدن کي زبردست خراجِ عقيدت پيش ڪيو آهي.
پنهنجي بيان ۾ صدر آصف علي زرداري چيو ته ڪشميري عوام جون قربانيون تاريخ جو روشن باب آهن. پاڪستان ڪشميري عوام جي حقِ خوداراديت جي ڀرپور حمايت جاري رکندو. ڀارت کي والاريل ڄمون ۽ ڪشمير ۾ ظلم ۽ جبر فوري طور بند ڪرڻ گهرجي، جڏهن ته اتي انساني حقن جون ڀڃڪڙيون به فوري روڪيون وڃن.
هن چيو ته سمورن سياسي قيدين کي آزاد ڪيو وڃي ۽ فوجي گهيرو ختم ڪيو وڃي. ڀارت کي والاريل ڪشمير جي آبادي جو تناسب تبديل ڪرڻ جون ڪوششون بند ڪرڻ گهرجن. 5 آگسٽ 2019ع جا هڪ طرفا ڀارتي قدم غير قانوني هئا.
صدر چيو ته عالمي برادري کي والاريل ڪشمير ۾ انساني حقن جي تحفظ لاءِ پنهنجو ڪردار ادا ڪرڻ گهرجي. ڄمون ۽ ڪشمير تڪرار جو حل ڪشميري عوام جي خواهشن ۽ گڏيل قومن جي قراردادن موجب ٿيڻ گهرجي. پاڪستان هر حال ۾ پنهنجي ڪشميري ڀائرن ۽ ڀينرن سان گڏ بيٺل رهندو.
آصف علي زرداري دعا ڪئي ته الله تعاليٰ ڪشمير جي شهيدن کي جنت الفردوس ۾ اعليٰ مقام عطا فرمائي.
يومِ شهداءِ ڪشمير جي موقعي تي پنهنجي پيغام ۾ وزيراعظم محمد شهباز شريف 13 جولاءِ 1931ع جي 22 ڪشميري شهيدن کي خراجِ عقيدت پيش ڪيو.
هن چيو ته شهيدن جون قربانيون ڪشميري عوام جي جدوجهد جو روشن باب آهن. يومِ شهداءِ ڪشمير عزم، همت ۽ ثابت قدمي جي علامت آهي، جڏهن ته ڪشميري عوام حقِ خوداراديت جي جدوجهد جاري رکيو اچن ٿا.
وزيراعظم چيو ته والاريل ڪشمير ۾ ڀارت طرفان انساني حقن جون ڀڃڪڙيون جاري آهن. پاڪستان ڪشميري عوام جي سياسي، سفارتي ۽ اخلاقي حمايت جاري رکندو ۽ ڪشميري عوام سان مڪمل يڪجهتي جو اظهار ڪري ٿو.
وزيراعظم وڌيڪ چيو ته حڪومتِ پاڪستان ڄمون ۽ ڪشمير جي شهيدن جي قربانين کي سلام پيش ڪري ٿي.
