ڪراچي: ڪوڪين ڊيلر انمول عرف پنڪي بابت ڇرڪائيندڙ انڪشافن جو سلسلو جاري آھي.
ذريعن جو چوڻ آھي تہ انمول کي نواب ٽائون لاھور مان گرفتار ڪري ڪراچي منتقل ڪيو ويو، ڪراچي پوليس جي گارڊن ۾ ڇاپي تي سوال کڙا ٿي ويا.
منشيات اسمگلر انمول عرف پنڪي جي گرفتاري جي معاملي ۾ نئون موڙ اچي ويو، پنڪي لاھور ۾ ويھي ڪراچي سميت پوري ملڪ ۾ نيٽ ورڪ ھلائيندي رھي، پوليس کي ڪا بہ خبر نہ پئي پر منشيات تي ڪم ڪندڙ حساس ادارا ان تائين پھچي ويا، پنڪي کي واٽس ايپ آن ٿيڻ سبب لاھور مان ٽريس ڪيو ويو.
حساس اداري انمول پنڪي کي لاھور مان گرفتار ڪري ڪراچي پوليس جي حوالي ڪيو، انمول پنڪي منشيات جي ڪيسن ۾ ڪراچي پوليس کي گھربل ھئي، ڪراچي پوليس جي گارڊن ۾ فليٽ تي ڇاپو ھڻي انمول پنڪي کي گرفتار ڪرڻ واري بيان تي سوال اٿڻ لڳا.
ويڊيو ۾ ڏسي سگھجي ٿو تہ پوليس آفيسر اطمينان سان دروازي تي پھتا ايتري ۾ اطيمنان سان انمول دروازو کوليو، مرد اھلڪار عورتن اھلڪارن سان گڏ فليٽ ۾ داخل ٿيا، انمول پنڪي جي تلاشي ورتي وئي، ھٿيار ۽ منشيات برآمد ڪئي وئي ۽ ملزمہ جي گرفتاري وڌي وئي.
