آمريڪي نيشنل انٽيليجنس جي ڊائريڪٽر تلسي گبارڊ انڪشاف ڪيو آهي ته آمريڪا ماضي ۾ 30 کان وڌيڪ ملڪن ۾ قائم 120 کان وڌيڪ حياتياتي تجرباتي ليبارٽريز (بائيو ليبز) کي مالي مدد فراهم ڪئي۔
آمريڪي نيشنل انٽيليجنس آفيس جي جاري بيان موجب انهن ليبارٽريز مان ڪيترين ۾ خطرناڪ ۽ تيزي سان پکڙجندڙ جراثيمن تي تحقيق ڪئي وئي، جنهن ۾ تڪراري “گين آف فنڪشن” (Gain-of-Function) تحقيق به شامل هئي، جڏهن ته نگراني جو نظام محدود رهيو۔
غير خفيه قرار ڏنل دستاويزن موجب يوڪرين ۾ 40 کان وڌيڪ تجرباتي ليبارٽريز اڳوڻي سوويت حياتياتي جنگي جراثيمن تي تحقيق ۾ مصروف هيون، جن ۾ اينٿراڪس، ايبولا، مڊل ايسٽ ريسپائريٽري سنڊروم (MERS)، سارس (SARS) ۽ طاعون جهڙن خطرناڪ جراثيمن تي ڪم ڪيو ويو۔
تلسي گبارڊ چيو آهي ته اڳوڻن عملدارن ۽ ڪجهه صحت ماهرن آمريڪي عوام کي انهن آمريڪي سهڪار سان هلندڙ ليبارٽريز بابت غلط ڄاڻ ڏني۔
هن وڌيڪ چيو ته انهن مرڪزن ۽ اتي موجود جراثيمن بابت معلومات گڏ ڪرڻ جو عمل تيز ڪيو ويو آهي ته جيئن عالمي صحت کي لاحق خطرن جو جائزو ورتو وڃي۔
تلسي گبارڊ جي بيان موجب صدر ڊونلڊ ٽرمپ سڄي دنيا ۾ تڪراري تحقيق “گين آف فنڪشن” (Gain-of-Function) لاءِ وفاقي فنڊنگ ختم ڪرڻ جو فيصلو به ڪري ورتو آهي۔
آمريڪي انٽيليجنس ادارن کي هدايتون جاري ڪيون ويون آهن ته ٻاهرين ملڪن ۾ موجود انهن تجرباتي ليبارٽريز ۽ اتي جاري سرگرمين جي نگراني وڌيڪ وڌائي وڃي۔
