دنيا جي مشهور ميسيجنگ ايپ واٽس ايپ پنهنجي استعمال ڪندڙن لاءِ هڪ اهم رازداري (Privacy) وارو فيچر متعارف ڪرائڻ جو اعلان ڪيو آهي، جنهن تحت هاڻي ماڻهو پنهنجو موبائل نمبر ظاهر ڪرڻ کان سواءِ به ٻين سان رابطو ڪري سگهندا.
واٽس ايپ هاڻي “يوزر نيم” (Username) جو نظام متعارف ڪرائي رهي آهي. هن فيچر سان هر صارف پنهنجي پسند جو هڪ منفرد يوزر نيم چونڊي سگهندو، جنهن ذريعي ٻيا ماڻهو کيس ڳولي، ميسيج يا ڪال ڪري سگهندا، بغير ان جي جو سندس موبائل نمبر ظاهر ٿئي.
هن تبديلي جو بنيادي مقصد استعمال ڪندڙن جي رازداري کي وڌيڪ مضبوط بڻائڻ آهي. اڳ واٽس ايپ تي ڪنهن نئين شخص سان رابطو ڪرڻ لاءِ موبائل نمبر ڏيڻ لازمي هوندو هو، پر هاڻي يوزر نيم ذريعي به اهو ممڪن ٿيندو، جنهن سان ذاتي نمبر غيرضروري ماڻهن کان محفوظ رهندو.
يوزر نيم ڪيئن ڪم ڪندو؟
واٽس ايپ موجب هر صارف 3 کان 35 اکرن تي ٻڌل منفرد يوزر نيم چونڊي سگهند.
هڪ ئي يوزر نيم ٻه ماڻهو استعمال نٿا ڪري سگهن.
جيڪڏهن پسند جو نالو اڳ ئي ڪنهن وٽ موجود هوندو ته ٻيو نالو چونڊڻو پوندو.
واٽس ايپ واضح ڪيو آهي ته يوزر نيم جي ڪا عوامي ڊائريڪٽري يا سرچ لسٽ نه هوندي. ڪنهن سان رابطو ڪرڻ لاءِ ان جو صحيح يوزر نيم ڄاڻڻ ضروري هوندو، جنهن سان غيرضروري ميسيجن ۽ اسپيم جا امڪان گهٽ ٿيندا.
واٽس ايپ هڪ اضافي “يوزر نيم ڪي” (Username Key) فيچر پڻ متعارف ڪرائي رهي آهي. جيڪڏهن صارف اهو اختيار فعال ڪري، ته صرف اهي ماڻهو رابطو ڪري سگهندا جن وٽ صحيح يوزر نيم سان گڏ اها ڪي به موجود هوندي، جنهن سان رازداري ۾ وڌيڪ واڌ ٿيندي.
جعلي اڪائونٽن کان بچڻ لاءِ واٽس ايپ اڳواٽ ئي ڪيترين مشهور شخصيتن، ادارن ۽ برانڊن جا يوزر نيم محفوظ ڪري رهي آهي، جيئن ڪو ٻيو ماڻهو انهن جي نالي سان جعلي اڪائونٽ نه ٺاهي سگهي. ان کان علاوه، جيڪي ماڻهو اڳ ئي ميٽا جي ٻين پليٽفارمن تي مخصوص نالا استعمال ڪن ٿا، انهن کي ساڳيو يوزر نيم حاصل ڪرڻ ۾ ترجيح ڏني ويندي.
واٽس ايپ هن وقت عالمي سطح تي يوزر نيم رزرويشن جو عمل شروع ڪري رهي آهي، جڏهن ته هي فيچر مرحليوار دنيا جي مختلف ملڪن ۾ جاري ڪيو ويندو.
واٽس ايپ جو هي نئون فيچر ان جي تاريخ جي اهم تبديلي مان هڪ سمجهيو پيو وڃي. ان سان صارف پنهنجي موبائل نمبر کي وڌيڪ محفوظ رکي سگهندا ۽ يوزر نيم ذريعي آساني سان ٻين سان رابطو ڪري سگهندا. رازداري، سيڪيورٽي ۽ سهولت کي نظر ۾ رکندي، هي فيچر واٽس ايپ جي استعمال جي انداز ۾ هڪ اهم تبديلي آڻي سگهي ٿو.
