لاھور جي گينگسٽر ۽ ڪاروباري شخصيت ٽيپو ٽرڪان والا جي پٽ امير بالاچ ٽرڪان والا جي قتل ۾ ملوث مک جوابدار خواجا تعريف گلشن عرف طيفي بٽ رحيم يار ۾ مبينا پوليس مقابلي ۾ مارجي ويو.
ڪرائيم ڪنٽرول ڊپارٽمينٽ (سي سي ڊي) موجب ڊي ايس پي، سي سي ڊي سيد حسين حيدر، ڊي او سي سي ڊي انسپيڪٽرعبدالهادي ۽ ڪانسٽيبل صغير علي اشتھاري جوابدار طيفي بٽ کي لاھور کان رحيم يار کان منتقل ڪري رھيا ھئا تہ سنجرپور بائي پاس وٽ اڇي ۽ بليڪ ڪلر جي ڪرولا ڪار ۾ سوار ھٿياربندن سرڪاري گاڏي تي حملو ڪري طيفي بٽ کي ڇڏائي ورتو.
پوليس موجب ٻن ڪرولا گاڏين ۾ 7 کان 8 جوابدارن پوليس موبائيل تي انڌاڌنڌ فائرنگ ڪئي، پوليس موبائيل جو ڊرائيور نور علي ساڄي ٻانھن ۾ گولي لڳڻ سبب سخت زخمي ٿي پيو.
واقعي بعد پوليس اٽالن جوابدارن جو پيڇو ڪيو، جنھن دوران فائرنگ جي ڏي وٺ ۾ طيفي بٽ ٿڏي تي مارجي ويو، جڏھن تہ کيس ڇڏائڻ لاءِ آيل سندس ساٿي فرار ٿي ويا .
پوليس پاران طيفي بٽ جي لاش ٽي ايچ ڪيو اسپتال صادق آباد منتقل ڪئي وئي آھي.
سي سي ڊي اهلڪارن تي حملي ۽ طيفي بٽ جي فرار ٿيڻ جو ٿاڻي جو ڪيس ڊي ايس پي سيد حسين حيدر جي مدعيت ۾ ڪوٽ سبزل ٿاڻي تي ڏوھ نمبر 826/25 تحت داخل ڪيو ويو آھي.
طيفي بٽ جي دبئي مان گرفتاري
گذريل سال 19فيبروري تي لاھور جي ٺوڪر نياز بيگ واري علائقي ۾ ھڪ خانگي سوسائٽي ۾ ھٿياربندن فائرنگ ڪري ٽيپو ٽرڪان والا جي نوجوان پٽ مير بالاڇ کي فائرنگ ڪري قتل ڪري ڇڏيو ھو، امير بالاڇ جي گارڊز جي فائرنگ ۾ ھڪ جوابدار بہ مارجي ويو ھو.
ڪيس ۾ مرڪزي جوابدار طور نامزد ٿيڻ تي طيفي بٽ دبئي فرار ٿي ويو ھو .
پاڪستان پاران طيفي بٽ جي گرفتاري لاءِ گڏيل عرب امارات جي حڪومت ۽ انٽرپول سان رابطو ڪري طيفي بٽ جي گرفتاري ۾ مدد جي درخواست ڪئي وئي، جنھن بعد پوليس طيفي بٽ کي ابوظھبي مان گرفتار ڪري عدالت ۾ پيش ڪيو، عدالت ۾ پاڪستان وڃي عدالتن کي منھن ڏيڻ واري راضپي تي کيس پنجاب حڪومت حوالي ڪيو ويو ھو.
ٻئي پاسي پوليس جو چوڻ آھي تہ طيفي بٽ جي دبئي فرار ٿيڻ بعد سيپٽمبر 2024 ۾، بالاچ جي ساٿين بدلو وٺڻ لاءِ طيفي بٽ جي ڀيڻويي جاويد ملڪ کي قتل ڪري ڇڏيو ھو.
ٽيپو ٽرڪان والا ڪير ھو ؟
ٽيپو ٽرڪان والا، جنهن جو اصل نالو عارف امير الدين هو، لاهور ٽرڪن وسيلي ٽرانسپورٽ جو ڪاروبارو شروع ڪيو، ڪاروباري ۾ ترقي ڪندي 300 ٽرڪن جو مالڪ ٿي ويو، جنھن بعد سندس نالو ئي ٽيپو ٽرڪان والا پئجي ويو، پوليس ذريعن جو چوڻ آھي تہ ٽرانسپورٽ جي ڪم سان گڏ و گڏ ٽيپو ٽرڪان والا پاڪستان ۾ هڪ بدنام جرم جو سربراهه هو.
علائقي واسين جو چوڻ آھي تہ ٽيپو ٽرڪان والا پنهنجي مشهور نالي ۽ شهرت باوجود، شروعات عاجزاڻي نموني ڪئي. هڪ وقت ۾ ھو ننڍڙو ملازم ھو ۽ وتس هڪ ٽرڪ جو مالڪ بھ نه هو.
ٽرانسپورٽ نيٽ ورڪ وسيلي ھو پاور ۾ آيو ۽ هڪ وڏي ٽرانسپورٽ ڪاروبار جو سربراهه بڻيو، جيڪو ٻڌايو وڃي ٿو ته لاهور جي ڏوهاري انڊر ورلڊ تي سندس تسلط ذريعي ٺاهيو ويو هو.
ٽيپو ٽرڪان والا جو ڏھاڪن کان نسلي تڪرار ھلندڙ ھو جنھن ۾ 2010 ۾ دبئي کان واپسي تي ھٿياربندن لاھور جي علامه اقبال انٽرنيشنل ايئرپورٽ تي حملو ڪري کيس قتل ڪري ڇڏيو ھو .
ٽيپو ٽرڪان والا پنهنجي ڏوهن واري زندگي جي ابتڙ، پالتو شينهن سان پيار ۽ هڪ ڪرشماتي شخصيت لاءِ مشهور هو.
دهشتگردي جي خاتمي واري عدالت سومر ڏينهن مقامي واپاري عارف امير عرف ٽيپو ٽرڪان والا جي قتل ۾ ملوث هڪ جوابدار کي ٻن الزامن تي موت جي سزا ٻڌائي. عدالت خرم اعجاز بٽ تي 200,000 رپيا جرمانو پڻ لاڳو ڪيو، جنهن کي سيڪيورٽي اهلڪارن جنوري 2010 ۾ علامه اقبال انٽرنيشنل ايئرپورٽ جي پارڪنگ ايريا مان گرفتار ڪيو هو.
شروعات ۾ سرور روڊ پوليس جوابدار خرم اعجاز بٽ خلاف ڪيس داخل ڪيو هو جڏهن ته شڪايت ڪندڙ جي ضمني بيان تي، پوليس ستن ٻين جوابدارن کي به ملوث ڪيو، جن ۾ خواجه عقيل عرف گوگي بٽ، خواجه طارق عرف طيفي بٽ ۽ ملڪ احسان شامل آهن.
خانداني دشمني جو پسمنظر
ٽيپو ٽرڪان والا جو طيفي بٽ جي خاندان سان ڏھاڪن کان نسلي تڪرار ھلندڙ ھو، رپورٽس موجب ڏهاڪن کان هلندڙ تڪرار جي نتيجي ۾ سندس خاندان جي ٽن نسلن جا ڪيترائي ماڻھو مارجي چڪا آھن، چيو وڃي ٿو ته اهو تڪرار سندس پيءُ اميرالدين عرف بالا ۽ هڪ مخالف ڏوهاري ماڻھن سان شروع ٿيو هو.
امير بالاج ٽيپو، پنهنجي پيءُ ٽيپو ٽرڪن والا جي وفات کان پوءِ به ڏوهاري ڪاروبار جي سربراهي ڪندو رهيو. هو لاهور جي انڊر ورلڊ ۾ هڪ اهم ۽ خطرناڪ شخصيت پڻ هو.
