لاهور: لاهور جي علائقي ڪاهنه ۾ ماءُ ۽ ٽن ٻارن جي پراسرار موت واري واقعي جو ڪيس قتل جي قلم 302 تحت داخل ڪيو ويو آهي، جڏهن ته پوليس مختلف رخن کان جاچ جو دائرو وڌيڪ وسيع ڪري ڇڏيو آهي.
پوليس موجب، ڪيس سب انسپيڪٽر ضيغم عباس جي فرياد تي داخل ڪيو ويو. ايف آءِ آر ۾ چيو ويو آهي ته واقعي جي حالتن مان ظاهر ٿئي ٿو ته چئني ڄڻن کي قتل ڪيو ويو، جڏهن ته واقعي جا اصل سبب ۽ حقيقتون فرانزڪ رپورٽ ۽ مڪمل جاچ کانپوءِ سامهون اينديون.
جاچ دوران معلوم ٿيو آهي ته واقعي واري ڏينهن گهر ۾ حلوو، چانور ۽ ٻوڙ تيار ڪيو ويو هو. پوليس انهن کاڌن جا نمونا، باورچي خاني مان پليٽن جا سيمپل ۽ واقعي واري هنڌ تان هٿ آيل ٻيا ثبوت فرانزڪ ليبارٽري ڏانهن موڪلي ڇڏيا آهن.
پوليس جو چوڻ آهي ته فرانزڪ جاچ ذريعي ممڪن زهر جي نوعيت ۽ موت جو اصل ڪارڻ معلوم ڪرڻ جي ڪوشش ڪئي پئي وڃي.
پوليس جو چوڻ آهي ته ابتدائي جاچ دوران گهر اندر ڪنهن به قسم جي مزاحمت جا نشان ناهن مليا، جڏهن ته ٿانون، ڊريسنگ ٽيبل ۽ دروازن جي هينڊلن تان فنگر پرنٽس حاصل ڪيا ويا آهن.
پوليس موجب، فرانزڪ رپورٽ ذريعي اهو به معلوم ڪيو ويندو ته واقعي وقت گهر ڀاتين کان سواءِ ڪو ٻيو شخص به گهر ۾ موجود هو يا نه.
پوليس وڌيڪ ٻڌايو ته گهر جي سربراهه ناصر کي تحويل ۾ وٺي سندس موبائل فون فرانزڪ جاچ لاءِ موڪليو ويو آهي. جاچ دوران معلوم ٿيو آهي ته ناصر پهرين جولاءِ تي پاڪستان آيو هو ۽ هو ڪافي عرصي کان برطانيا ۽ آمريڪا ۾ رهندو هو، جڏهن ته متاثر خاندان به ڪجهه وقت اڳ آمريڪا مان پاڪستان موٽي آيو هو.
اختيارين موجب، فوت ٿيلن ۾ 15 ورهين جو ريحان، 12 ورهين جي اريشا، 11 ورهين جو ارسل ۽ سندن والده علينه شامل آهن. ابتدائي ڄاڻ موجب، علينه ذهني بيماري جو علاج پڻ ڪرائي رهي هئي.
پوليس جو چوڻ آهي ته چئني لاشن جو پوسٽ مارٽم ڪيو پيو وڃي، جڏهن ته فرانزڪ رپورٽون ملڻ کانپوءِ وڌيڪ حقيقتون سامهون اينديون، جن جي بنياد تي ايندڙ قانوني ڪارروائي ڪئي ويندي.
