واشنگٽن (انٽرنيشنل ڊيسڪ) آمريڪا ۽ ايران وچ ۾ وڌندڙ فوجي ڇڪتاڻ ۽ وچ اوڀر مان تيل جي فراهمي متاثر ٿيڻ جي خدشن سبب عالمي مارڪيٽ ۾ خام تيل جون قيمتون ٻيهر وڌڻ لڳيون آهن. تيل جي مارڪيٽ ۾ سيڙپڪارن کي خاص طور تي آبنائي هرمز مان سپلاءِ ۾ ممڪن رڪاوٽن جو خدشو آهي، جنهن سبب عالمي قيمتن تي دٻاءُ وڌيو آهي.
عالمي مارڪيٽ ۾ خام تيل جون قيمتون وڌي ويون
رپورٽن موجب برينٽ خام تيل جي قيمت 96 ڊالر 54 سينٽ في بيرل تائين پهچي وئي، جڏهن ته ڊبليو ٽي آءِ خام تيل 91 ڊالر 71 سينٽ في بيرل تي پهچي ويو.
ان کان علاوه مربان خام تيل جي قيمت ۾ 7 ڊالر في بيرل اضافو ٿيو، جنهن کانپوءِ ان جي قيمت 106 ڊالر في بيرل تائين پهچي وئي.
تازو آمريڪا ۽ ايران وچ ۾ ٻيهر فوجي ڪارروائين کانپوءِ تيل جي مارڪيٽ ۾ سپلاءِ بابت خدشا وڌيا آهن. عالمي مارڪيٽ ۾ برينٽ ۽ ڊبليو ٽي آءِ ٻنهي جي قيمتن ۾ تازو اضافو به ان ئي جيو پوليٽيڪل ڇڪتاڻ سان ڳنڍيو پيو وڃي.
پاڪستان ۾ به پيٽرول ۽ ڊيزل مهانگو
عالمي مارڪيٽ ۾ تيل جي قيمتن ۾ واڌ جو اثر پاڪستان ۾ پڻ نظر اچي رهيو آهي.
حڪومت پاران 2 سيپٽمبر کان پيٽرول جي قيمت ۾ هڪ رپيو 8 پيسا في ليٽر اضافو ڪيو ويو، جنهن کانپوءِ پيٽرول جي نئين قيمت 343 رپيا 87 پيسا في ليٽر ٿي وئي.
جڏهن ته ڊيزل جي قيمت ۾ 51 پيسا في ليٽر واڌ ڪئي وئي، جنهن کانپوءِ ڊيزل جي نئين قيمت 370 رپيا 92 پيسا في ليٽر ٿي وئي.
آمريڪا-ايران ڇڪتاڻ، تيل جي مارڪيٽ لاءِ وڏو خطرو
تيل جي قيمتن ۾ واڌ جو اهم سبب وچ اوڀر ۾ وڌندڙ ڇڪتاڻ ۽ عالمي سپلاءِ بابت خدشا آهن. خاص طور تي آبنائي هرمز مان تيل جي آمدرفت ۾ ڪنهن به وڏي رڪاوٽ جو خدشو عالمي توانائي مارڪيٽ لاءِ اهم خطرو سمجهيو پيو وڃي.
جيڪڏهن آمريڪا ۽ ايران وچ ۾ فوجي ڇڪتاڻ وڌيڪ وڌي ٿي يا تيل جي سامونڊي آمدرفت متاثر ٿئي ٿي ته عالمي مارڪيٽ ۾ خام تيل جون قيمتون وڌيڪ وڌڻ جو امڪان پيدا ٿي سگهي ٿو، جنهن جو اثر پاڪستان سميت ڪيترن ئي ملڪن ۾ پيٽرول، ڊيزل ۽ ٻين شين جي قيمتن تي پڻ پئجي سگهي ٿو.
